回顧前一日: 桂林DAY1 (深圳北站,桂林北站,蘆笛岩,象鼻山,西城路步行街,日月雙塔文化公園,正陽路步行街)
第二日,我哋一大朝早起身,連早餐都冇時間食就要出發到香江大飯店,準備坐車上龍脊梯田。上梯田嘅交通可以有好多方法訂得倒,而我哋就係訂梯田民宿時,托佢哋幫我手訂08:30班次。我哋戈日早左半個鐘到香江大飯店,見有小小時間就喺附近食碗米粉做早餐。你哋冇睇錯,又係食米粉XD不過呢間認真麻麻0.0 到差唔多時間就開始有好多小巴停左喺停車場度等上客。雖然民宿覆我話會早一日覆我車牌號碼,但我冇倒 =.= 咁只好問司機架車去邊=[ 上錯左一架,叫我去第二架@@ 亂到喊出嚟 TAT 咁我哋就係上咗車先比錢司機,位位50蚊人仔。OOKK喇,坐三個鐘車。去到梯田會有職員上車收入場費,位位100蚊人仔,如果喺上面住都係比1次夠=]
坐左三個鐘車終於到喇^^ 原先以為梯田好細,咁去兩日實可以行哂喇...點知咁諗就大錯特錯@@ 呢兩日一夜,我哋剩係留喺大瑤寨梯田觀景區。
坐左三個鐘車,米粉早已消化到7788,加上接下來嘅活動就係行山上酒店。民宿老板話要行一個半鐘山先到,但我哋行咗三個幾鐘都有@@因為行吓停吓又影吓相咁XD 所以好好彩喺停車場食左啲嘢回一回氣先XD我哋見特別,就叫左碗米豆腐同油茶。米豆腐質感就硬過普通豆腐小小,但都夠滑,酸酸辣辣凍食一流。而油茶就冇乜味道@@不過試下又無妨嘅
沿路上都見倒有小販賣煮雞蛋,番薯,粟米等
行左冇耐,就行到第一條橋,橋上有幾個原住民擺檔賣手工藝
入到農村好舒服^^空氣清新,人又少。見倒滿滿作物發現其實農村生活好簡單,有溫飽就已經滿足。唔似城市人要追名求利,每日鬥生鬥死又為啲乜?
食唔哂就曬筍乾,可以保存耐啲唔浪費
上山途中見倒有好多走地雞通山跑,主人會唔會唔認得邊隻雞係自己?哈哈
不過做馬就辛苦喇,作為運輸工具,每日背住啲重嘢上山落山@@
再行上山,梯田景色一覽無遺
其實今次我嘅簡錯時間來,據婆婆講,每年3-4月頭會有油菜花田,梯田種滿油菜花;到端午左右,梯田會放水,一格格會儲滿水;到秋天會一片金黃;而冬天就有雪。所以今次去就只見倒荒蕪嘅田(啱啱收獲完油菜花之後嘅雜草)@@ 不過就算咁都已經好靚@@所以都期待下次再來=]
尼個就係儲左頭幾格水嘅樣。如果全梯田都儲滿,你話幾靚^^
今晚我哋就住喺度,萬景樓客棧。對山上住宿就唔好有咁大期望喇,如果要有5星級酒店水準咁你就來錯地方喇!
客棧係木造建築,所以房內係唔準生火同煲水,要熱水就喺大堂拎佢個熱水保溫壺上房用。 整體來說,客房都叫乾靜嘅,加分位係房窗對出就係一片梯田,靚到爆!!不過房內係冇冷氣嘅,但夜晚開窗訓清涼舒服^^ 唯一唔慣嘅係用痞廁而冇坐廁=[
酒店再行多10分鐘內就行到一號觀景台,係三個觀景台之中最高,亦都少人嘅一個=]
觀景台上面有個原住民賣粉麵,咁我地見時候唔早,夜啲食夜晚,但晏晝又冇乜點食嘢,就諗住叫碗麵求求期期食小小。點知婆婆煮左一大煲比我哋^^ 望住但靚景食就是爽 XD
婆婆話佢民宿(店鋪樓上)就起好,叫我哋下次來可以住喺佢度,喺山下微信佢,佢就準備定竹筒雞等,行到上來就有得食咁話喎。
食完煲米粉,就喺觀景台度影吓相。同婆婆閒聊幾句,講下咩月份來有咩特別景色睇。傾吓傾吓婆婆就問我哋肚唔肚餓,食唔食竹筒雞。但我哋啱啱先食完煲米粉,仲飽飽地,所以就話夜啲先。見差唔多時候,就返酒店放低行裝。睇完酒店menu之後就決定出去揾餐廳醫肚XD 其實梯田餐廳大多係民宿經營,價錢都差唔多。
我地原本諗住上去搵婆婆食雞,但奈何天黑黑到伸手不見五指@@只好起酒店附近搵左間民宿餐廳。我哋正想點隻雞,但老板話食完雞會食唔落其他野,話下次如果4-5人來先考慮吓@@所以只好放棄=[ 咁我地就叫左炒野菇, 竹筒飯同臘肉炒生筍。梯田嘅野菇菇味一流!!可以話係我目前食過最香嘅茹!而竹筒飯味道就其實沒特別,只係睇住佢叉住,放入火度烤戈下有趣。尼餐埋單都200幾人仔,扺唔扺就見人見智喇。
食完餐飯,戈間民宿主人就抱住個B同我哋吹左陣水。佢話我哋住戈間萬景樓同全景樓都係外邊人開嘅。尼個亦係主要一個主要原因點解我唔喺返自己住戈間酒店度食喇。住,我哋要求乾淨就算;而食,就想食返地道風味!除左呢個之外,亦有講我哋普遍用咩通訊軟件(就係佢哋冇嘅 FB同whatapps) 同埋訂房用邊個中介。變咗文化交流,呢個氣氛好好,我好鐘意^^ 最後當然或多或少都有提及到少少政治嘢(好大膽,幾驚落唔返香港@@)不過出乎意料嘅係佢哋都認同,亦都嚮往我哋有戈份自由! 點解我哋有嘅自由一絲絲比人剝削緊嘅時候,仍冇人維護?
時間為當地時間九時左右,但氣氛已經好似半夜咁,冇人冇燈好靜。我哋邊傾返頭先嘅話題,呼出白煙(入夜都幾凍)邊行返旅館。今晚都要早啲訓,難得上到梯田高點,當然要睇返次日出喇!
繼續看...桂林DAY3 (大瑤寨梯田觀景區-七星追月, 金佛頂)
留言列表
